PamagCUSA Blog

Makadwa, ding mapilan a talasuyu ning metung a ahensyang gubyernu keni king compound ning kapitolyu, e ku ne pu sabyan nung isanu, mipabalitang mua la kanu kanaku, uli na ning e ke pu kanu buring ideklarang piyesta opisyal iting aldo na ning PAMAGBUWIS (note: the agency referred to is BIR) nang biye ning kekatamung bayaning Jose Abad Santos.

Pauna ku na pung sasabyan na la pung katutuan kaniting pamisip, uling ala kanaku ing upaya ban gawan iti.

Dapot, akung migunam, nung talagang pakipate da ring mapilan ing pagmasusian ya iting aldo, kalalam at kalapad na yata ning lugud at pakamal da kang Tang Peping. Mu pin, e ku balu nung kayabe tala ngening kaorasan.

Makanyan man, nung miparakal la pa sana reng Kapampangan a malablab a pusu kareng karelang bayani, palage ku, alang balakid a e tamu agyung lampasan.

Pilan mo pu kekayu ngeni ing mekagawa nang kasamyentu, o itang ausan dang last will and testament? Karitak da pa. Masanting siguru ing gawan tana la, uling pota mabigla tamu, at akalakwanan tala ring kekatamung pamilya. Dakal na pung pamikatagun na ing pamikalugud minye yang dalan king pamisagsagan pauli na mu ning metung a gabun, alahas o nanu pa mang pibandiyan.

Anya pin asabi ku iti, uling ing kekatamung bayaning Jose Abad Santos, minye yang masampat a last will and testament king anak nang Pepito, a makaparikil mu naman kareng balang metung kekatamu.

E ka kikyak, anang tauling sinabi. Nung pigunaman taya, balamu baligtad ing sitwasyun: nung ninu na ing malapit nang mate, iya pa ing manaru. Kasakit na yata nita ne po? Nanu kaya ing dinalan king mura nang isip Pepito inyang dimdam na na retang akbung a memupus king biye nang tata na? Memintu ya pin kaya at pemigil na ing kayang luwa? Mapalyaring minagululgul ya I Pepito at gilisak ne lagyu I tata na.

E ka kikyak. King kanakung malukang palage, atin yang mas malalam a kabaldugan iting panabilin. Anti na mong sinabi ning ibpa king anak, magsaya ka, alang rason ot kailangan kang manangis.

Ing kadwa nang panabilin, iya pin ing pakit mu karela ing matapang ka. Agkatan da kayung migunam, nanu na mo kaya ing panlalawe da ring banyaga kekatamu> matapang a lipi? Lampas ning kutkutan, agkatan na ka tamung Jose Abad Santos na itas taya ing karangalan tamu antimong Pilipinu, at iti magumpisa king kekatamung sarili. Respetuan ta la ring sarili tamu, at resptuan da katamu mu naman ding aliwa.

Ing katlung panabilin, metung a karangalan ing mate para king kekatamung sariling bansa. Dapot, iti metung ya namang panagkat na mibiye-biye para king Pilipinas. Luguran taya iti, e mu king amanu, nune maging king pekamalating dapat at kasuyuan.

At ing tauling panabilin, ali mibibiye karing eganagana ing anting kalam. E ta ngan mayaus king pangamartir king altar ning pangamemalen. Dapot, mayayaus tamu ngan na manyalese king kekatamung kapaligiran, king kekatamung sarili, king kekatamung pamakiagum kareng aliwa, at king kekatamung pamintuan a Diyos.

Panupaya yu pu sana nung makuyad mu ing kanakung inapse, dapot titas ne ing aldo at akakit ku na mangabilis na kayung mamepe. Migit pa kaniti, ating manenaya kanaku kayari na niting pamagmasusi. Makanyan mu rin ating manenaya kareng balang metung kekatamu kasara na niting programa, at alang aliwa nune ring kekatamung pamilya, komunidad, lalawagan at bansa. Manenaya lang mabiye bayani, a makaibye halimbawa nung makananu ing mabibiye antimong tapat at responsabling memalen.

King mapilan a penandit, mamanuli tana kanyan, at mibalik na kareng sarili tamung pibalebale, o kaya naman mamalengki. Malyari mu naming taglus king mall at panayan yang mamuklat ban makapanalbe kang Aga Mulach ampong I Anne Curtis. Mananu na sanang ding tauling amanu nang Jose Abad Santos mikintal la king pamisip ding balang metung kekatamu, at miliwat la king masalese at mayap a dapat king ikanono na ning lalawigan at bansa. At nung makananung sasabyan na ning pari, meyari na ing misa, ume na kayu king kapayapan, aku namang sasabi ngeni, megumpisa na ing biye, ume na kayu king pangabayani.

Iya na mu pu ita, at dakal a salamat keko ngan.