Ibat Santa Rita, Kapampangan Angang San Jose, California - Aida Aguas
Ibat Santa Rita, Kapampangan Angang San Jose, California
Kanita ding Kabalen manalbe lang palage lalam da ding telon o kaya pinaud a balung-balung neng e la makapunta karing tune teatru. Disan da ring Amerikanung miyankup ing kaburyan da ding Kapampangan karing palage. Sasapak la kanita deng stage plays ketang panaun ding Kastila. Agpang karing larawan mayayakit karing aklat at sasabyan ding talasulat at kwentu ra ding matwa. Tigtigan, terakan, drama, o trahedya. Palage o dulang makabalen buri dalang dadaywan kanita. Agyang makatapakan la bitis ding dakal, neng makanyan ing kaugalian kanita, dapot pakasinakle nala man ampong baru't saya ding babayi. Ding lalaki paka-kamisa la at maki kupya buntuk. Wa, kanita pa atin nalang anting-Broadway deng Kapampangan. Anya ali ta mangapamulala neng ngeni dakal la ding maki-kegiwan karing miyayalwang alit maki galo at tigtigan ding tau keta kekatamu. Ngening panaun ning matas a belwan pan-teknoloya karing mangaragul at makabayung lugal aliwang bangsa miras na ini.
Ding bayani tamung linakad king kekatang kalayan, dinalan na't apulung, 110 banwa ing milabas ngeni keti Amerika, e lamu sundalus at alagad ning kalayan at katuliran pantau, alagad nala naman ning entabladu, tigtigan at aliwa pang aske ning Literatura at alit. Padre Anselmo Fajardo, Aurelio Tolentino, Juan Crisostomo Soto, at aliwa ampon ding anak karela, di Hukum Zoilo Hilario, Amado Yuzon, Monico Mercado, Padre Quirino Canilao at dakal pang aliwa. Balu tamung mabilug kapuluan Filipinas minambag la king kalinangan ding kabalen areni ampo karing aliwang bangsa.
Dapot pauli ning mipaburen yang malambat ing kekatang kalinangan memigsu mete lubus ini. Nung ali ne binyayan Doktora Evangelina Lacson ing AKKAP o Akademyang Kapampangan at kayabe nang watas king AGTAKA, Aguman ding Talasulat Kapampangan, mekad e ne migising pasibayu ing kekatang kalinangan. Dapot e isip-isipan a maging tutu ing miras la keti Amerika ding kayagum ning arti sta rita. Labi na atang adwang banwa kanya manibatan ketang mitatag ya ini. Neng mipaltutu ing karelang tour, bina kami pang mebigla king panyatang da. "Mekeni,Tuki Ka!", apatuki na kami pin! Tara na, nananu ta keni, nganang Abogada Lou S. Tancinco.
Meliswas kaming talatuki ning kalinangan Kapampangan keni Bay Area. Agyang dakal a daraptan sinaup memangalat papelitus ning arti sta rita. Karing libraries, tindahan, farmers markets. Sulit ing pagal at milabas mu rin ing kapigaganakan. Mekalingwan ngan ini, anyang dimdam mila ding katutubung dilang Kapampangan! Alang balid karela, balamu atyu ka king Pampanga at kayabe ka karela. Masaya, makatula ya ing palage, anti ka mong minuli at mekikit pasibayu karing kakaluguran at kamaganak king BalenTibwan kening gawa nang Andy Alviz. Manayun at taglug-taglus yang mapinung dinagus ing palage. Apitungi-tungi nala ding dalit a memilug king metung a kwentu. Kwentung makayakma king bie ming Kapampangan a dake ning panyatung diaspora.
Maki malalam yang payabut dapot ali ne gewang mabayat, mayan ya't kalakalale minukyat karing diwa at linub karing panamdam kapamilatan da ding miyapse kapusungan at masayang dalit. Makabage paralan at makayakma karing kabilyan at uri ning pamibyebye ding tinagun. Magaling la ding artista, gamat deng gamat ing karelang delang obra lipat dayat. Ding aliwang pengari e la sinawang maglikas king Amanung Inglish karing salita, neng ding anak da e la binang matalustus king Amanung Kapampangan. Ing piganapan a San Jose Center for the Performing Arts karin ya naman linage ketang apat ya pang banwa ing apu kung lalaki anti mong kayabe nang Aladdin. Linub king ukul da ding menalbe kalupa ku mekad: Ah, Amanung Siswan, pauli ding dalit mung inatad da ding arti, ikit ming pasibayu ing kekaming ibatan.
Puge karing tau Santa Rita ibat karing kabalen Silicon Valley at Bay Area! Makasayang akakit ing pamisanmetung at saya rang magobra ding memaala at sasaup. Nung parating makanyan ing pamisanmetung taglus-taglus na ing panyulung ning Kapampangan king pamanimuna na ning kaluguran tamung Pun Lalawigan Amung Ed Panlilio. Puge at kapasalamatan karing magmasabal a kabalen antimo i Willie Carpio a metung karing mitatag king arti. Di Val Sibal, Alan Ramos, Kilou Castro-Engelhardt, ampo i Bessie at Jerome Aguas a balu kung minantabe king pamangalat kapabalwan.