PamagCUSA Blog

Jesus Christ For President

Pamagat ne ning metung a bayung linwal a aklat keni Amerika, sinulat neng Shane Claiborne, Chris Haw at kakaluguran da. Minuna nang gawang Shane ya pin ing "Irresistible Revolution". Ing nasa ra at talindu rening adwang aklat kawangis da ing nasa nang Jim Wallis. Ing karelang uliran a dakal na sinulat a aklat antimo ing pikabalwan a "God's Politics". Bina yang kilala i Jim Wallis, kapilan pa metung yang manimunang talapagsalita king San Diego, California ketang maragul a pamipulung dikil keng pamangawang curriculum a ituru karing pipagaralan keni Amerika. Manakit tamu pa kayang taung wawangis kang Kristu ngening panaun ayni ?

Kanita keni Amerika mengayna kami at mengalungkut neng i Senador John Kerry ali na erapan mitmung sikanan at kesyasan itang pamanyira kayang alang katutwan king Pamiabnu Vietnam. Patye ing kelan katutwan lalto magtagumpe ding salitang dulum, at Lucifer lalto la at magaganaka. Patye deng darapat mayap at malinis nasa, ila pa ding mangadalum at mipaparusan at maralas mangaturan pa karing pakasake tidwa parugan at sandatan mamakbung, ding talasalpantaya king Kayapan mangalambut la at milalako kapanwalan.

Mapalyaring yan ing buri rang malyari ding talatuki ning dalumdum, ing mangasira la lub ding memalen. Kanita ding sasabat karela mina la at dumitak. Pamiabnu king diwa, psycho war. Makanyan ing malilyari mabilug yatu, anya pin pala ngara ding aliwa, ing impiernu atyu keti sulip. I Yesu Kristu metung yang karaniwan radical, makanini ing laman ning "Irresistible Revolution". Tutukyan neng Shane ing pamibyebye nang Kristu, binang masakit pakyapusan ing dakal karing gagawa na. Dapot agyu tamu ita nung bisa tamu. Ngening mewala ya biye i Manbabatas Crispin Beltran at abalu ing keyang meging kabyayan, magaganaka ing biye nang Kristu at dening kalupa nang Jim Wallis, Shane at aliwa pa. Karing masalapi atin mu naman makanini daraptan karing tau. I Senador Edward Kennedy, agya mang mika kamalyan yang depat a mibulalag kanita, meyakit ing pamanyisi na kapamilatan da ding gewa nang mangayap a obra king Batasan ning Amerika.

Nung alben me i Ted Kennedy patye magobra ya Senado alang-alang karing mangalating tau Amerika at aliwang bangsa, e mu aisip a ding mangasalapi at kilala nang tau magobra lang anting damulag agya pang atyu nala king idad a sukat nalang paynawa. Balang aldo makabuklat ing pamangawang batas atyu la ding kalupa nang Crispin Beltran at Ted Kennedy king Senado o king Mababang Bale Batasan, nung alayu rin king sukulan o king ospital i Ka Bel. Makanini la ding malugud king bangsa ra, agyang e la miyayaspiling bandera ning Pilipinas o Amerika karing imalan dang susulud. http://blog.beliefnet.com/godspolitics/2008/05/the-lion-of-the-senate-by-jim-1.html

E memun i Ka Bel karing Batasan Dalan, o Parliament of the Streets a awsan da, kalupa na kanu ning keyang kaburyan o paninap, dapot ing sagisag ning meging sangkan ning keyang pamaglako lakwas yang masalang kabaldugan ning keyang tune aral a buring pamana at imasala karing Filipinu. Atin pa kayang lakwas malino paralan bang ikatamu akit taya ing turu at biye buri nang ipakit Kristu, kesa king panganagbag nang Ka Bel king keyang Bale Maluka ?

Ali ke pa binasa ing "Jesus For President" bina yang malalam, malaman, masanting yang pigunaman. Makabayu yang aske aklat, dapot manwala naku a ing pamanuki mu king biye nang Kristu yang makapagbayu kekatamu. Deng Among Ed Panlilio, Grace Padaca, anti la mong ala nung balang metung kekatamu e tuki karing turu at dapat nang Kristu. Anya pin sa i Senador Barack Obama agad nang papasa karing tau, karing keyang talatuki deng kutang at suliranan ning malilyari king kayang kampanya Amerika. Antimo ing balu ta ing Demokrasya ya pin ing Pamamuntukan da ding Tau. E pa man sinambut i Barack Obama atin neng pamana - ing pamanyubli nang miye ning turu nang Kristu anting metung a politiku. I Kristu e wari agad nang babalik ing kutang at sukat pakibat karing talatuki na ?

Neng paganaka nang Senadora Hillary Rodham-Clinton ang pamamate kang Bobby Kennedy at gewa nang biru ing pamamaril kang Barack nitang metung a tau, lakwas tayang agaganaka i Kristu. Lakwas tamung sisipag gagawa karing katungkulan tamung mamaala king kekatang sarili. Ing tune talatuki nang Kristu atin yang masabal king Yatu. Pante-pante ing lawe na karing tau, Kristyanu o ali, babayi o ali, mabandi o ali. Nanu man ing bansag da o pamalagyu, ing politiku nang Kristu yang pekamayap tukyan keti yatu. http://www.barackobama.com/2008/05/23/remarks_of_senator_barack_obam_68.php

Anting kapasalamatan at pamangilala king gewa rang Dumingu ning Amanung Kapampangan balang Tawli nang Dumingu ning Bulan ning Agostu ning Sangunian Panlalawigan a linagda nang Pun Lalawigan Amung Ed Panlilio, oini pu ing panalangin tamu at parangal karing kekatang Kabalen watas at pantas. Gaganakan ya naman at pasalamatan ing meyanguna biye Doktora Evangelina Hilario-Lacson a ali pepatugut tatayid karing kabalen na anga king tawli nang inawa bang e makalingwang ing Kalinangan (kultura) Kapampangan. Pablasang pekamalan na ing turu ding keyang bayaning nunu, i Doktora Lacson kilalanan de at pekyabayan ding gagalangan tang kabalen antimo i Pamuntuk Diosdado Makapagal ampo i Chancellor Emmanuel Y. Angeles, at aliwa pa. Ali ke kalingwan ing metung nang panabilin, " Ali ka tutuknang susulat Kapampangan, pauli ning pamanuknang ning pamanyulat karing amanu yang maging sangkan ning pangamate ra. "

Nung mete nala deng poeta, malili la ding anak ra.
anting poesya nang Kristu, yang misalba king Yatu.

Poesyang lugud, pantas lang mikabus
king Yatung matbud, maybug mabaldug.

Igpa ning Balayan, poeta ning Katutwan
kekeng paninapan, akudta ing kaligtasan.

Maraig ing dulum, miral ing mayap.
Poetang bayu, manyambut ya'y Kristu!

Aida D. Tanglao
Mayu 24, 2008