PamagCUSA Blog

Mipakde Ka Balen

Migising ka Balen! Pilan yang ukdung dindam karing mangatenakan watas at mangakudtang Kapampangan. King radyu DZAB kanita balang Biernis Bengi pin ata nung e ku magkamali, ding Poeta Laureado Meyangubie Jose Gallardo ampo ding aliwa pang kayabe nang watas (poeta) gagale lang mangasanting a dalit ampon kawatasan. Ding makanyan a parandam da karing media masikan lang mamye belwan karing kayanakan. Pauli ning Bengi ning Kawatasan ampon Crissotan apilasa ku ing legwan at yaman ning kanakung Amanung Siswan.

Mangatimbang lang salita, mangalaman a amanu ding iyapse rang pamamalino at pamamatulid detang mag-crissotan a alang babasan. Mayayakit keni ing pamanisip malalam at matinung kapanwalan. Ding pake ding pisasabyan kanita ali la man dikil karing sigalut a mangalalang karing politiku. E la dikil karing marinat imalan a pipipyan. Tema lang dikil king ulaga ning biye, kapanwalan, at telakaran abe lang lakwas ding legwan at ganaka ning Tibwan ampong ning Miglalang.

Ding Kapampangan matikdi la't marangal, makaukit la karing ukul at diwa ding Filipinu ini. Ding karelang ganaka at kapanupayan balita karing aliwa. Dapot ing karelang tepangan ampon lugud king Balen da at Bangsa makalaman mu naman king Amlat ning Yatu. Ketang panaun da ding manyakup, neng ing Kapampangan makalibutad yang lugal king pusad ning kapalyaryan maralas yang agad darasnan da ding managap. Pauli nini dakal la karela ding mengalto bayani, lalaki at babayi.

Banwang metung pepakit dang pasibayu ing karelang panga-makabalen, misanmetung la bang maging Gobernador ing Paring Eddie T. Panlilio. Anya ding Kapampangan mibalita nala nanaman mabilug yatu. King ukdung ini ali nala daywan o foreigners ding kalaban da, balamu kalupa da nalang Kapampangan. Ing suliranan king sugal, kapalalwan at pisasabyan mangawalang abli king quarry o balas. Mabilug Kapuluaan Pilipinas at aliwang bansa yatu tinalangan at minanga la karing kabalen.

Katataulyan, mika malinis na sa at malino pamalakad king Lalawigan Kapampangan! King kerakalan da ding trak a mamakut balas a akakit karing superhighways, sukat neng Developed a lugal ing Kapampangan. Mangasanting nala sukat ding dalan, ospital, eskwela at dakal a obra at pamangan. Alang daranup. Matas la sweldu ding mestra't mestru at magobra king gubiernu. Alang bayad ing magaral karing eskwelang publiku. Alang anak kalat-kalat dalan magpalimus. Balang lugal ating libraries, health centers, playgrounds, parks. At aliwa pa.

Meyakit malino king pamalakad nang Among Ed Panlilio ing dayu ning pepalub dang abli ding Mitatang Gobernador Lapids karing akakit a abli ning Pari.

Mangaganaka la ding Kapampangan, mapanupaya la. Ala ku pan dindam a manintun karing abling aliwa karing mengalabas a banwa. Ngeni, ining Paring manintrigang dakal a pera, makabuklat kwenta, Ya kanu ing buri rang ilako at dedemanda. Nanu pu yan?

Kapampangan, Mipakde Ka ! Miglinis ka. Lalako muna ing marok king pamalakad anya pinili me ing Pari. Pelisan mune at inisis ing Capitolyu, bakit ali muna isundu ini? Paytake ka king indredos? http://services.inquirer.net/print/print.php?article_id=20080815-154724 Basan ya ing sinulat nining mayap a taung ini. Dakal la pa ding taung atin panga-racist o prejudiced. Anya maligwa lang masusulsul karing mangulu. Patune nini keni Amerika ya pin ing kinalat dang Muslim ya i Senador Barack Obama. Misip tamu pang makatapulu, o makadinalan bayu tamu paytuki karing aliwa. Nang ibye ra ren king kekatang payntungulan. Nang uring balayan ing buri tang lakwan karing kayanakan?

Ninu ing panwalan mu ing manintrigang pera at tutuki karing Batas o nanu. Balen Migising Ka! Ali mune bibili ing bola bang e masamsam ing kekang Katimawan.

Ketang Ka-27 nang Aldo ning Hunyu, 1987 ding mamuntukan ning Akademyang Kapampangan o AKKAP inabut de ing makalagda rang Parangal kang Poeta Laureado Vedasto D. Ocampo anting Ari Ning Parnasung Kapampangan. Deti ila ri Diosdado P. Macapagal, Evangelina H. Lacson at Archimedes T. David. Metung karing sinulat nining pagmaragul talasulat ning Balean Magalang ya pin ing " Ing Tubud Ning Dios ", sinulat ne ketang salungsungan deng gugulwan ing pamalakad nang Pamuntuk Cory C. Aquino ding memanyubuk coup d'tat kanita. Adwa lang tumpuk ding inagtal kung maka yawig king kabilyan Kapampangan ngeni:

Mipakde ka kabalen ku! Mibule kata saguli
uling king pamimalad ku mamitamit kang masawi,
wari't ibye me king diablo ing katiting mung taliri
pakitaglus-taglus nana pati bitukang malati,
inya ing mayap tang daptan mibule kata't mangadi
ban e dugpa keka't kaku - ing malyaring e ta buri.

E wari keta king EDSA ing ka - Diosan linaganap?
At ikwa tang migtagumpe king parasan tamung mayap?
O'nung sindu tamu sana ing dakila tang paninap
E sa linub ing personal at pansariling pigagap,
Sana, ing pamikalugud menusbung ampon miganap
At ing tune Demokrasya.... e sana mig-undap-undap.

Mayap tamung pigunaman ini ngening Banwang Mumuna tamung diling pagmasusyan ing Dumingu ning kekatang Amanung Siswan. Masayang Aldo pu kekayu ngan Kabalen!